Вечерва од 21 часот во предворјето на црквата „Св. Софија“ на програмата на Охридско лето е интернационалниот ZZ Quartet, а ќе настапат Симон Занчини – хармоника (Италија), Ратко Зјача – гитара (Хрватска), Адам Нусбаум – тапани (САД) и Мартин Ѓаконовски – контрабас (Македонија).
Впечатливите иницијали на бендот ZZ потекнуваат од презимињата на иницијаторите Ратко Зјача (гитара) и Симон Занчини (хармоника). По сензационалниот деби-албум „The Way We Talk“ (In + Out Records), тие започнаа да свират заедно со Мартин Ѓаконовски (бас) и Адам Нусбаум (тапани) со што пишуваат ново подглавје во историјата на џез-музиката.
Симон Занчини вели: „Она што со сигурност го имаме се европејските корени, многу класични влијанија, фолкор, авангарда, импровизација, а понекогаш и фјужн… “. Гитаристот Зјача е од Хрватска, но Холандија му постана дом во изминативе 23 години; хармонистот Занчини е од Италија; басистот Мартин Ѓаконовски е од Македонија, но 25 години живее во Бергиш Гладбах, во близината на Келн; а авторитетот на тапани, Адам Нусбаум е од Њујорк.
Меѓународната борбена единица на естетски можности е во потрага по вистината надвор од општо-прифатените линии на ограничување. Ратко вели: „Сè што слушаме оди во она што го правиме. Страста кон филмската музика, како и тајната љубов кон рокот, восхитувањето од класичната музика, копнеењето по фолк, и секако, вжарената желба за џез и неговите можности на импровизација…“.
OhridNews
