На годинешната 29. меѓународна изложба на иновации МАКИНОВА 2009 која заедно со саемот за техника ТЕХНОМА 2009 година се одржа од 13 до 17 октомври во Скопје, ЕМО ОХРИД освои златен медал за производот со кој учествуваше на оваа манифестација.
Се работи за Високонапонски трополен раставувач РЕМ 12-36 кв со електромоторен погон за вклучување и исклучување. За разлика од досегашното искуство кога овој апарат се манипулираше само рачно, со оваа иновација имаме можност за далечинско вклучување и исклучување на апаратот, информираат од ЕМО.
На овој проблем работеше Одделението за развој во фабриката за Разделувачи и Столбни и портални трафостаници при ЕМО ОХРИД. Покрај златниот медал инженерите Зоран Тодороски и Драган Славкоски кои работеа на овој нов производ добија и по еден златник.
И во услови на економска криза ЕМО ОХРИД и понатаму работи уште на неколку нови производи кои на пазарот треба да се појават во 2010 година, велат од ЕМО Охрид.
Ohridnews
