Во ревитализираниот дел од деградираното Студенчишко блато животот во потполност се враќа. Претходно затрупан во тони шут, овој дел од блатото сега блика од живот. Водата формира малечко езерце од кое виреат нови форми на живот.
Проектот за ревитализација на дел од Студенчишкото блато минатата година заеднички го реализираа „Оhridnews“ и Македонското лимнолошко друштво.
Големи количини најразличен цврст отпад беа подигнати од блатото, ревитализираниот простор се загради и уреди, а беа засадени и автохтони растенија. Животот таму сега повторно се враќа, што е од огромно значење за целокупниот екосистем на Охридското Езеро чиј составен дел е Студенчишкото блато.
За жал некои навики тешко се менуваат па така во ботаничката градина несовесни граѓани оставиле ѓубре а оштетени се и дел од информативните табли. Наскоро просторот ќе биде целосно исчистен и преуреден, а информативните табли ќе бидат вратени на свое место.
Ohridnews
