Жителите од втора урбана заедница бараат в долж кејот Македонија да не се предвидуваат градби со голем габарит и просторот да не се пренатрупува со објекти. Своите барања тие ги изнесоа и на неодамна одржаната јавна презентација на нацрт планот за дел од втората урбана заедница што се однесува на планскиот опфат помеѓу улиците Кеј Македонија, улица 8 –ми Март, Партизанска и улица 1.
– Бараме да се зачува човековата околина, а не на прво место да се ставаат личните интереси бидејќи станува збор за многу значаен дел од градот. Слушаме дека ќе се намали катноста на предвидените објекти во прв ред, но тоа е потребно и за останатите. Со изградба на големи градби дополнително ќе се доведе до затворање на просторот со што се намалува струењето на воздухот поради што се зголемува загадувањето за што доказ е и маглата која последните години е се поприсутна, велат жителите.
Дел од нив бараат и да им се остварат нивните права во однос на изградба на инфраструктурата,односно нивните објекти да имаат пристап на улица како што тоа им било ветено кога ги граделе куќите.
– Во 1985 година кога добив одобрение за градба ми беше ветено дека до мојот објект ќе биде пробиена нова улица на која подоцна беа изградени уште 25 објекти. Но, и по изминати три децении, поради нерешени имотно- правни односи и една диворадба улицата за која сме платиле комуналии не е изградена и се снаоѓаме како знаеме, еве јас конкретно преку гаража излегувам од мојата куќа. Доколку, кога го земав одобрението за градба, знаев дека нема да има улица до објектот можеби и немаше тука да го градам, вели жител од овој дел од градот.
Своите забелешки граѓаните од овој дел од градот ги дадоа до надлежните во локалната самоуправа, каде заклчучно 30- ти јануари траеше јавната анкета за нацрт планот. Се надеваат дека тие ќе бидат уважени од страна на комисијата и дека конечното урбанистичко решение на кое се чека веќе неколку години наскоро ќе биде изгласано од страна на советот на општината.
Т.К.
