Францускиот актер Жерар Депардје ја продава својата вила во Париз, а локалните медиуми пренеле дека за неа барал 50 милиони долари. Вилата од 1800 квадратни метри се наоѓа во срцето на квартот Сен Жермен де Пре, кој е дом на многу славни личности, соопштила групата Даниел Фео која се занимава со продажба на недвижности. Изградена во 1820 година за баронот од Шамбон, вилата има градина и базен, што е ретко во центарот на Париз.
Агентите за недвижности не сакале да ги потврдат медиумските извештаи дека актерот, кој вилата ја купил во 2003 година, за неа сега барал 50 милиони долари. Жерар Депардје одлучил да се пресели во Белгија како би избегнал плаќање данок. Француските власти имаат намера од следната година да воведат данок од 75 проценти за богатите чии приходни годишно се поголеми од милион евра.
