Инветситорите ќе можат да купат државно неизградено земјиште за изградба на хотел по цена од едно евро за метар квадратен, информираше Министерството за транспорт и врски.
Оттаму појаснуваат дека почетната цена на јавните наддавање за продажба на градежно неизградено земјиште на кое според деталните урбанистички планови е предвидена изградба на објекти за индустрија и стопанство и за хотели, ќе биде евро за метар квадратен на територијата на целата држава.
Државата со години се обидува во Охрид да привлече светски хотелски бренд, но поради високите критериуми понуденото атрактивно земјиште на охридското крајбрежје не привлече заинтересирани инвеститори. Со последната одлука државата отвара можност за изградба на нови хотели, а изедначениот критериум за отуѓување на државното неизградено земјиште конечно им дава шанса и на домашните инвеститори, кои немаа можност да конкурираат на претходните огласи за продажба на државно земјиште за изградба на елитен хотел во Охрид.
