Експерти од Машинскиот факултет од Скопје во каналот Студенчишта започнаа со вештачење на бродот „Илинден“. Истрагата треба да ги утврди причините кои доведоа до големата несреќа во која загинаа 15 бугарски туристи.
Вештаците вршеа премер и фотографираа одредени делови од бродот „Илинден“. Според најавите целата постапката ќе трае неколку дена.
Претходно истражниот судија од Основниот суд во Охрид, Весна Кичеец, која го води случајот, на експертите им го достави целосниот извештај од истрагата, кој треба да им помогне на вештите лица во експертизата. Во Охрид денеска не допатуваа стручните лица од Хрватска и Словенија, кои ќе учествуваат во вештачењето во подоцнежната фаза.
Бродот „Илинден“ на 5-ти септември потона во водите на Охридското Езеро во близина на авто кампот Елешец. Во несреќата се удавија 15 патници, а повеќе од 40 беа спасени. Единствен осомничен за несреќата засега е капетанот на бродот, Сотир Филески, а од вештачењето ќе зависи дали истрагата евентуално ќе биде проширена и на други лица.
Г. Момироски
