Законот за Охрид кој се наоѓа во владина процедура, би можел да се најде пред Собранието до крајот на оваа година, оптимистички се надева пратеникот Владо Стефаноски.
За законот се изјасни Министерството за култура, а се очекува тоа да го направи и Министерството за животна средина. Охридскиот завод и Музеј ги изготви заштитно конзерваторските подлоги, но покрај грижата за културно-историското наследство, овој комплексен закон опфаќа и други сегменти како екологија, туризам и друго и потребно е време за негова квалитетна изработка, вели Стефаноски.
Тој посочи дека репер за изработка на Законот за Охрид е Законот за Дубровник и на други заштитени градови во регионот. Законот треба да овозможи квалитетна заштита на природното и културното наследство и прецизно да уреди бројни други односи во општината. Пратеникот на ВМРО ДПМНЕ, Стефаноски, истакна дека тој и неговите колеги од Охрид интензивно ќе работат Законот за Охрид да влезе во собраниска процедура до крајот на оваа година, а доколку тоа се случи тој би започнал да се применува во 2010 година.
