Охридските бродови кои од 17-ти јули се закотвени во пристаништето поради забраната за пловидба што им ја изрече Капетанијата, затоа што им истече регистрацијата, дневно трпат загуба од околу 400 евра. Вкупната загуба на бродовите „Галеб“, Кристина“, Александрија“ и „Македонија“, до сега се проценува на над 15 000 евра и секојдневно се зголемува.
Од Здружението на бродари полека губат надеж дека нешто ќе се промени и не се оптимисти дека патничките бродови ова лето ќе испловат од пристаништето.
-Стигна нов допис од овластениот регистар на бродови „Биро Веритас“. Oд нас се бара да обезбедиме дополнителна документација, со што шансите процедурата околу техничкиот преглед да заврши брзо пропаѓаат и нема надеж кај нас дека ова лето ќе запловиме на Охридското Езеро.-изјави Горан Устијаноски од Здружението на бродари.
Тој истакна дека бродарите ќе бараат надомест на штетата од државата, но и одговорност од Капетанијата, која според нив, е виновна за состојбите во внатрешната пловидба.
– Ќе мора да има реорганизација во Капетанијата, затоа што повеќе вака не оди. Работите еднаш мора да се постават на место и oваа институција да работи стручно и одговорно.-велат од Здружението на бродари.
