Жителите на САД за Денот на благодарноста во онлајн продавниците купиле стока во вредност од 1,06 милијарди долари. Ова е прв пат оваа година американците за еден ден да потрошат толкава сума пари. Купувањата биле направени во повеќе од илјада интернет продавници, а вкупно биле регистрирани 180 милиони посети на тие сајтови. Притоа, 21 процент од купувањата биле извршени со мобилни телефони. Весникот „USA today“ исто така забележал дека сите купувања биле извршени после празничниот ручек. Било наведено дека иако обичните продавници не работат на Денот на благодарноста, еден од најголемите празници во земјата, модерната технологија овозможува да се купува не станувајќи од фотелјата.

После Денот на благодарноста во САД настапил „Црниот петок“, денот на најголемите попусти и почетокот на божиќните распродажби. До Божик, 25 декември, според проценката на Националната федерација на трговците на мало, жителите во САД ќе потрошат повеќе од 602 милијарди долари. Покрај тоа, експертите укажуваат на зголемена активност кај онлајн порачките. Ако минатата година на „Сајбер понеделник“, кој доаѓа непосредно по овој викенд, била продадена стока во вредност од 70 милијарди долари, оваа година прогнозите се уште пооптимистички и се предвидува потрошувачка од 82 милијарди долари.