Фудбалерите на Охрид запишаа нови три бодови на табелата во Втората македонска фудбалска лига-запад, победувајќи ја Дрита со 1-0 (0-0), во 19-та рунда од шампионатот.

Со минималниот триумф на „Билјанини Извори“, „рибарите“ успешно стартуваа во финалните битки од третиот натпреварувачки круг и го задржаа курсот во борбата за позицијата број два на табелата.

Добриот почеток на натпреварот на охриѓани резултираше со две шанси. Прво покрај голот биеше Аде Мазари, а потоа гостинскиот голман Амир Јашар го одбрани ударот на Роберт Митев. Гостите се заканија преку Амир Алији, кој биеше во добро поставениот охридскиот голман Никола Симоновски.

Охрид продолжи со офанзивната игра. Шансите се редеа пред гостинскиот гол, кои само поради голманот Јашар останаа на нула во првиот дел. Ѓорѓиески биеше прецизно во десниот долен агол, Јашар беше на место. Гостинскиот голман добро интервенираше и при обидите на Целески и Митев. Последната шанса во првиот дел им припадна на гостите. Елмир Алији беше највисок во скокот и со глава биеше малку покрај голот.

И првата шанса во вториот дел ја имаа гостинските фудбалери. Капитенот на Дрита силно шутираше од 20-тина метри, но Симоновски без посериозни проблеми го скроти ударот.

Во 50-та минута, Охрид, го најде лекот за противничката одбрана и гостинскиот голман Јашар. Целески со глава ја погоди мрежата, после прецизно нафрлување на Вељаноски.

Гостите од шок терапијата можеа да се вратат одма. Амир Алији се добро направи, но ударот со глава ја погоди рамката од голот, а одбиената топка заврши во рацете на Симоновски. Охриѓани ја стабилизираа играта и не дозволија премногу простор за игра. Добра прилика имаше Наумовски, кој влезе во игра на местото од Мерсовски.

Во финишот Дрита имаше шанса преку Лескароски, кој со глава биеше над голот. До крајот ја имаа топката во свој посед, но без посериозна закана за погодок и егал во Охрид.

Охрид во следната 20-та рунда го очекува пауза, а мечевите ги продолжи во април месец.

  • Состави:

Охрид: Симоновски, Вељаноски, Цуцули, Лекоски, Ѓорѓиески, Целески, Митев, Мазари, Мерсовски, Трпески, Петрушевски

Дрита: Јашар, Мислими, А. Алији, Љума, Реџепи, Е. Алији, Зеќири, Лескароски, Синани, Алили, Асани.

Мх.П.