Висок е притисокот во кампот на росонерите, Миланело, каде на вчерашниот отворен тренинг за гледачите, за време на играта десет на десет, се пресметале напаѓачот Златан Ибрахимовиќ и бранителот Огучи Онијеву.
Швеѓанецот ни малку нежно стартувал врз американецот кој по стартот го возвратил ударот и го нападнал Ибрахимовиќ. Рапсправијата не ескалирала благодарение на реакцијата на тренерот Масимилијано Алегри, кој го прекинал тренингот и ги повикал двајцата фудбалери на разговор во неговиот кабинет.
Потпретседателот на Милан, Адријано Галијани, излезе во јавност со смирувачка изјава, објаснувајќи дека ваквите работи често се случуваат, и воопшто нема да ја наруши атмосферата кај миланезите.
Корпулентниот Американец Онијеву, во Милан дојде пред две години, но поради повредата на коленото заработена на квалфикацискиот меч САД – Костарика, оттогаш настапи само еднаш во “црвено-црниот“ дрес и тоа против Цирих во Лигата на шампиони.
Милан во викенд колото утре му гостува на последнопласираниот Бари.
