Александар Велјаноски (26), Александар Фармакоски (26) и Димче Ноќески (28) се ранети во вооружениот инцидент што вчера рано утрото во 4:50 ч. се случил  на булеварот „Туристичка“. Сите се здобиле со прострелни рани.

Најтешко е повреден Александар Велјаноски кој се здобил со 5 огнострелни рани, додека Фармакоски и Ноќески се здобиле со по една рана од огнено оружје. Тројцата веднаш биле пренесени на хируршкото одделение при општата болница.

“Првоповредениот има здобиено  стрелни рани во пределот на стомакот и во пределот на десната препона и прострелни рани во предел на грбот, поткожно муслкулна повреда, повреда на десниот лакат со скршеници и исто така огнострелна повреда  во левата натколеница. Другите двајца имаа мекоткивни повреди на левите натколеници на долните екстремитети. Сите тројца се прифатени извршено е дијагностицирање и соодветно се згрижени од лекарскиот тим“, информираше директорот на општата болница Охрид, д-р Арсо Митрески.

Митрески информираше дека Велјаноски бил реанимиран и дека врз него веднаш била извршена операција во хируршкото одделение. По консултации со соодветните клиники при Медицинскиот факултет во Скопје околу 8:30, Велјаноски е префрлен во Ургентниот центар во Скопје, каде подоцна му е извршена уште една операција и сега се наоѓа на клиниката за анестезија и реанимација.  Фармакоски и Ноќески  се згрижени во општата болница во Охрид и се надвор од животна опасност.

Траги од крв на местото од инцидентот
Вооружената пресметка се случила пред зградата во која живее Велјаноски. Жителите од зградата видно вознемирени не сакаа да зборуваат за инцидентот. Не се познати деталите за самата престрелка. Се знае дека помеѓу Велјаноски и другите две лица од поодамна владее меѓусебно нетрпение кое  кулминирало утринава кога меѓусебната расправија завршила со  пукање.
Увид на местото на настанот извршила екипа на СВР Охрид и истражен судија. Полицијата не соопшти поединости за случајот, освен дека учесниците во престрелката  биле  познати сторители на кривични дела. Истрагата што е во тек треба да расветли   кој на кого и со какво оружје пукал и кои биле мотивите за вооружената  пресметка, која ги вознемири охриѓани.

Г.Момироски
С.Костоски