Во петок ќе се изведе претставата „Метод“

Најпоставуваниот современ шпански текст „Метод” (El mètode Grönholm) од Жорди Галсеран, повторно на репертоарот на Народен Театар Охрид.

Претставата зборува за последното интервју на финалните четири кандидати за висока позиција во голема интернационалана компанија. Во оваа приказна, преку интриганта сатира кон модерното сфаќање на капитализмот и општеството воопшто, се анализира природата на човекот. Концептот го поставува човекот во инфериорна позиција во однос на “големата слика” и го поставува прашањето колку голема е всушност “големата слика”? Преку интензивните трилер ситуации се игра со публиката и она што таа мисли дека го знае, исто како што дејствието си игра со ликовите и она што тие мислат дека го знаат. Така се создава еден модерен психолошки трилер со интензитет и темпо што ја вовлекува публиката толку активно да ги прати заплетите што и самата станува петтиот лик во оваа пиеса, вели режисерот на претставата Ирена Стеријовска.

Претставата во која играат: Стрезо Стаматовски, Ивица Цонев, Елизабета Стефановска, Јаков Спасов, ќе се изведе на 22-ри март, петок, со почеток во 20 часот.

Картите по цена од 200 денари се пуштени во продажба на билетарата при НУЦК “Григор Прличев”.

OhridNews