Во мај оваа година  Владата ќе почне да гради 1.000 социјални станови и 320 станови за млади брачни двојки, кои се очекува да бидат завршени во првото тримесечие на 2009 година.
Тие се дел од Програмата на Владата за инфраструктура која предвидува изградба на 2.500 социјални станови и станови за млади брачни двојки.

Станови ќе се градат во повеќе градови во земјава меѓу кои и во Охрид. Површината на становите е од 35 до 45 метри квадратни. Цената на становите за млади брачни двојки ќе биде до 550 евра за метар квадратен, а за социјалните станови ќе чини околу 470 евра за метар квадратен.

Условите за плаќање ќе бидат поволни, но нив подоцна ќе ги утврдат министерствата за транспорт и врски и за труд и социјална политика.  Предност за становите ќе имаат децата без родители и семејства со десетина членови кои живеат заедно.

Министерот за транспорт и врски Миле Јанакиевски информираше дека становите ќе се делат на транспарентен начин со претходно утврдени критериуми, преку софтверско решение, онака како што се делеа и ЦЕМТ дозволите.