Наградата за првиот словенечки добитник на „Златниот венец на СВП“ е признание и за севкупното учество на современата словенечка поезија од самиот почеток на Струшкиот поетски фестивал и потврда за нејзиното живо присуство, не само во регионот, туку и пошироко, истакна македонскиот поет Богомил Ѓузел во беседата посветена за годинешниот лауреат на „Златниот венец на поезијата“ на Струшките вечери на поезијата, словенечкиот поет Томаж Шаламун.
На свеченоста што се одржа во катедралната црква Света Софија во Охрид, Ѓузел со пиетет говореше за врвните поетски достигнувања на Шаламун, кој како што истакна е еден од ретките европски поети кој силно се почитува и во современата американска поезија. Ѓузел потсети и на силата на песните на Шаламун, кои како што рече ги разнишаа неповратно сите идеолошки препреки во тогашна Југославија.
Лауреатот Шаламун пред присатните на свеченоста во Св. Софија одрецитира неколку негови одбрани песни.
Струшките вечери на поезијата завршуваат денеска со традиционалниот поетски митинг „Мостови“.
Ohridnews
