Тринаесет лица ги загубија животите во поплавите кои следеа по големото невреме кое во саботата вечерта го зафати Азурниот брег, на југоистокот од Франција, соопштија во неделата локалните власти.
Пороите ги преплавија улиците на Кан и на Ница, а податоците за настраданите се менуваа од час во час, а на крајот се пронајдени 13 безживотни тела во департманот Алпи-Маритимес, во француската покраина Прованса-Алпи-Азурен брег.
Спасувачките екипи имаат големи тешкотии при пристапот во зоните во кои има настрадани, што укажува на тоа дека бројките за жртвите сé уште не се конечни.
Францускиот претседател Франсоа Иланд ја истакна „солидарноста на нацијата“ и им упати сочувство на семејствата на жртвите. Премиерот Мануел Валс, кој е во посета на Јапонија, ја искажа „длабоката тага поради страшните последици од невремето и поддршката за семејствата на загинатите“. Министерот за внатрешни работи, Бернар Казнев, пак, во неделата претпладнето треба да допатува во погодените подрачја.
OhridNews
Извор:„Макфакс“
