Општина Охрид, Здружението на граѓани “5-ти септември” од Охрид, Ротари клубот “Пирдоп” од Р.Бугарија и Ротари клубот “Охрид”, во недела заеднички ќе ја одбележат годишнината од големата бродска несреќа на Охридското Езеро во која трагично ги загубија животите 15 граѓани на Р.Бугарија.
По тој повод на 5-ти септември во 10 часот во црквата “Св.Никола-Геракомија” ќе се одржи Црковен помен за трагично загинатите.
Попладнето на местото каде се случи трагичниот настан, на плажата Елешец, делегации на општините Охрид, Антов и Пирдоп предводени од градоначалниците и членови на семејствата на загинатите ќе положат цвеќе. Делегациите и членовите на семејствата ќе положат свежо цвеќе и на Спомен-плочата на жртвите на бродската трагедија во градскиот парк.
На 5-ти септември 2009 година во 10.35 часот на околу 200 метри од брегот во близина на плажата Елешец потона бродот „Илинден“. Во несреќата загинаа 15 бугарски туристи. Истрагата траеше повеќе месеци и се очекува наскоро да започне судскиот процес за најголемата бродска несреќа во историјата на Охрид и Македонија.
