Во последно време нема празник, конкурс, тендер, изјава, а најголемите политички ривали, ВМРО ДПМНЕ и СДСМ да не отворат расправа во јавноста. Меѓусебните обвинувања овој пат се околу неодамна распишаниот конкурс на Министерството за култура за избор на Град на културата во 2011 година, на кој општината Охрид по неколкуте неуспешни обиди, годинава реши да не учествува, што беше причина за реакција на ВМПРО ДПМНЕ.
– Локалната власт во Охрид предводена од СДСМ кој е изгубен во својето тесно партиско слепило и очајниот рејтинг, покрај тоа што минатата година бессрамно го извалка одбележувањето на Свети Климент и доделувањето на Светиклиментовата награда, само затоа што е прогласен од страна на Владата за државен празник, сега најавува дека Охрид немало да се кандидира за Град на културата за 2011 година и тоа само затоа што конкурсот е распишан од Министерството за култура на Република Македонија. Само затоа што оваа Владата на ВМРО-ДПМНЕ на сите полиња на живеењето прави исчекор напред . Само затоа што СДСМ пропаѓа од завист. -се вели во реакцијата на општинскиот комитет на ВМРО ДПМНЕ.
Од оваа партија сметаат дека локалната власт предводена од СДСМ е неспособна да изготви квалитетен проект со кој ќе се натпреварува со другите општини, туку се задоволува со проекти од типот на „Духот на Охрид“ и слични натприродни и невидливи проекти. ВМРО ДПМНЕ советува градоначалникот да не води политички инает, а локалната самоуправа да поднесе кандидатура за Град на културата во 2011 година. Доколку за тоа им е потребна помош од ВМРО ДПМНЕ најавија дека се подготвени да ја понудат.
