Викендов на стрелиштето во касарната во Битола се одржа досега најмасовното Државно Првенство со воздушно орујжје во категорија на јуниори-ки и сениори-ки во дисциплината воздушна пушка и пиштол.

На ова првенство учество зедоа околу деведесеттина стрелци во сите категории, што е досега најголема масовност во изминативе десеттина години. Најдобрите стрелци се натпреваруваа на современо опремено стрелиште со електронски мети, онака како што се натпреваруваат и на светските и европските Првенства и Купови.

Во сениорска категорија во дисциплината воздушна пушка, Мартина Петровска од СК ,,Охрид“ се закити со златен медал, со резултат од 589,4 кругови. Во категорија на јуниорки, нашата најдобра јуниорка Јована Милевска на ова Државно Првенство не успеа да обезбеди пласман меѓу првите три позиции, па со резултат од 597,5 круга, таа се пласира на петтата позиција.

Марија Ванѓеловска во истата категорија се пласира на 13-тата позиција, Калина Чепуњоска на 15-тата, додека Ива Маленко на 16-тата позиција. Во екипен пласман јуниорки, со резултат од 1717,3 круга, јуниорките се пласираа на 4-тата позиција.

Во категорија на сениорки пиштол, Валентина Гоџоска од ЖСК ,,Лихнидос“ се пласира на 6-тата позиција со резултат од 500 кругови, како и Велибор Балоски исто така од ЖСК ,,Лихнидос“ на истата позиција во категорија сениори пиштол со резултат од 521 кругови.

Најголемо и најпријатно изненадување приредија младите јуниори на пиштол. Стефанија Вељаноска од СК ,,Охрид“ вицешампионка за 2022 година со резултат 502 круга. Иван Милевски, исто така, од СК ,,Охрид“ вицешампион за 2022 година со резултат од 482 кругови. Со бронзен медал пак се закити Климент Мостро од ЖСК ,,Лихнидос“ со резултат од 481 кругови.

Во дисциплината воздушна пушка јуниори, нашиот најдобар стрелец Бојан Спасеновски од ЖСК ,,Лихнидос“ повторно на вицешампионската позиција со резултат од 598,8 кругови. Неговиот клубски колега Никола Спироски се пласира на осмата позиција со резултат од 565,7 кругови, додека Кристијан Балоски од СК ,,Охрид“ се пласира на 14-тата позиција со резултат од 510,9 круга.

Уште два настапи до крајот на месецов ги очекуваат дел од нашите стрелци надвор од државава.

OhridNews