Во рамки на акцијата за чистење на Охридското Езеро од неексплодирани убојни средства, што ја спроведува Дирекцијата за заштита и спасување, нуркачката екипа од Охрид пронајде два минофрлачи кои потекнуваат од периодот на Првата светска војна. Според кустосот од охридскиот Завод и Музеј, Никола Целакоски, орудијата се произведени во Нирнберг Германија во далечната 1916 година.


–    Првични претпоставки се дека тоа се орудија кои и припаѓале на бугарската армија која после капиталуцијата во септември 1918 година ги исфрлила во водите на Охридското Езеро, а тука непосредно отпочнува и македонскиот фронт на Галичица кој се протегал до Егејското Море во должина од 450 километри, изјави Целакоски.


Покрај овие орудија пронајдено е и едно ѓуле кое потекнува од 15 век. Согласно законот за културно наследство, орудијата ќе бидат преземени од Заводот и Музеј Охрид каде ќе бидат конзервирани, и ќе служат како експонати. Според Целакоски пронајдените орудија имаат големо историско значење, бидејќи се работи за ретки експонати.

–    Не верувам дека во Македонија на друго место имаме вакви експонати, рече Целакоски, кој не ја исклучи можноста во понатамошниот тек на акцијата да бидат пронајдени уште вакви орудија.


Според претпоставките на научните работници во непосредна близина на Охридското Езеро постоела касарна од каде пред налетот на другите војски орудијата и муницијата биле фрлени во езерото за да не паднат во раце на непријателот.


Во Охридскиот Завод и Музеј се чуваат и околу 150 орудија од отоманскиот период, најверојатно од 17 и 18 век кои пред неколку години беа извадени од водите на Охридското Езеро кај Сараиште. Тие се конзервирани и реконструирани и ќе бидат изложени пред јавноста во март оваа година.

Горан Момироски