Земјоделците од охридскиот регион кои се регистрирани во единствениот регистар за вршители на земјоделска дејност, како и правни лица на кои земјоделството им е основна дејност, најдоцна до утре ќе можат да конкурираат за закуп на државно земјоделско земјиште. Станува збор за 22 хектари (80 ари) земјоделско земјиште на подрачјето на општина Охрид, кое државата го дава на користење од 15 до 50 години.
Барателите на земјиштето треба да подготват програма која ќе ги содржи податоците за техничко-технолошката опременост, економската оправданост, можноста за нови вработувања, како и цената што ја нудат за закуп на еден хектар.
-Максималната површина за која може да аплицира и да добие еден понудувач е 10 ха. Почетната цена за годишна закупнина на еден хектар земјиште е 3.967 денари, но апликантите за закуп може да понудат и повеќе.- се објаснува во јавниот оглас на Министерството за земјоделство, шумарство и водостопанство ( број 11/9).
Образецот за учество на огласот земјоделците ќе можат да го подигнат во Подрачната единица на ова министерство во Охрид. Образецот треба да биде пополнет со сите потребни податоци и заедно со потребната документација треба да биде доставен во затворен плик. Во спротивно, барањето нема да биде разгледано.
