Подигнување на еколошката свест и давање помош на Охрид, пред и се на природата и езерото првенствено при расчистување на дивите депонии кои ги создаваат многу наши несовесни граѓани, но и хуманитарната компонента, односно наводнување на дрвореди, миење на јавни површини се работите кои луѓето од Здружение на граѓани „Еко Фап“ го прават волонтерски, од хоби, давајќи голем придонес за природата и средината во која живееме.

Диви депонии со кабаст отпад имаше на периферијата на градот под селата Велестово, Рамне, не е изолирана ни целата Галичица во атарите на помалите села, Трпејца, Љубаништа. Живееме во едно од најубавите места, град на Унеско, град на уникатно езеро, не секој ја има привилегијата да живее во ваков град. Основната поента е дека секој еден граѓанин кој го ужива охридскиот воздух и охридската вода во рамките на своите можности да даде малку душевен данок, барем малку да се оддолжи на тоа што ни е дадено од природата – вели Горан Устијаноски претседател на здружението.

Немаме намера да се мешаме во работата на ниедно јавно претпријатие, тие си ја вршат својата работа максимално, нашата цел е само да помогнеме со оглед на тоа дека премногу загадуваме. Доволно е малку да се грижиме за најблиската средината околу нас додава Устијаноски.

Иницијативата ја започнавме со едно возило камион кој го набавивме со свои средства и со него до ден денес имаме направено преку 40 акции. Од секоја акција е подигнато помеѓу 10 до 13 кубни метри претежно кабаст отпад, бидејќи можностите не ни дозволуваат да собираме градежен отпад. Од град Скопје добивме едно противпожарно возило и од општина Охрид уште две противпожарни возила од кои едното е веќе репарирано и почнавме да го користеме во оној дел каде здружението ја остварува хуманитарната компонента, односно наводнување на дрвореди, миење на јавни површини. – истакнува Устијаноски.

Досега се измиени површините во градската болница, во пресрет на празникот Илинден во Рамне се расчисти дел од простор кој им беше потребен за прославата, а следниот период испланирано ни е миење на малото плоштатче околу музичкото училиште. Се надеваме дека можностите ќе ни дозволат пред почетокот на учебната година да ги измиеме дел од училишните дворови во некои училишта. Ефектот кој го создаваме е само нус производ од нашето задоволство, апсолутно сме волонтери, групата на луѓе која е константна е претежно од бродарството, вели Устијаноски.

Н.С.Ј.