Успешно второ издание на Peshtani Extreme Vertical

Изминатиот викенд се одржа второто издание на Peshtani Extreme Vertical – дводневен меѓународен спортски настан за љубителите на планинското трчање.

Во својата понуда настанот вклучуваше три трки: детска треил трка со старт и финиш во Пештани; вертикал трка со старт во Пештани и финиш на врвот Чумо Влага (1801 м.); и Бајраче треил со старт во Елшани и финиш во Пештани. Бајраче треил беше новитет оваа година и истата е долга 23 километри. Трасата на тркачката патека се движи од Елшани – Црни Камен – Корита – врв Лако Сигној (1973 м.) – врв Бајраче (1924 м.) – Пештани.

Со овие трки се опфатени најубавите делови на Галичица со најубави погледи по досега нови и неоткриени патеки. Целта преку ваквите настани е да се поттикнува спортскиот дух кај месното и поширокото население, како и да се промовира здрав начин на живот. Настанот поддржува промоција на спортскиот и планинскиот туризам и има за цел да го интегрира локалното население во своите активности и подготовки, велат организаторите.

Ова дводневно доживување беше овозможено од бројни поддржувачи кои се вклучија со донации или со волонтирање.