Едeн од најпрепознатливите објекти во Охрид, куќата на Уранија е предадена на користење на Македонската академија на науките и уметностите. На промоцијата на овој реновиран споменик на културата  присуствуваа министерот за култура Елизабета Канческа-Милевска, академикот Георги Старделов, претседател на МАНУ, Паско Кузман, директор на Управата за заштита на културното наследство, директорката на Заводот, Тања Бунташеска-Паскали, како и други гости од јавниот и политичкиот живот.

Министерката за култура на претседателот на МАНУ на симболичен начин му го врачи клучот од куќата на УРАНИЈА каде во иднина ќе биде префрлен дел од Академијата.

– Денешниов ден го сметам за историски, бидејќи се отвара една нова страница во историјата на МАНУ, која делумно се преселува во Охрид и овде се надоврзува големата традиција на овој славен град кој ја шири вистината и убавината за Македонија во целиот свет. Овде во палатата Уранија се формира разгранок на МАНУ за да се воспостави таа парабола помеѓу минатото на Охрид и сегашноста, кој ќе се нарекува Охридски книжевен центар. Во него ќе има чести средби на балканските академии и длабоко сум уверен дека благодарение на куќата на Уранија ќе дојде до поголемо зближување на научно поле на балканските академии, истакна претседателот на МАНУ, Георги Старделов.


Според плановите на МАНУ куќата на Уранија ќе биде и седиште на Асоцијациите на сите Балкански академии, а  постои иницијатива, овој објект да биде Книжевен центар на литературата од Светиклиментовата епоха . „Оваа иницијатива ќе придонесе, Охрид да прерасне во најбогатата научна база на Балканот, која е посветена овој период од творештвото“, додаде Старделов.


Куќата на Уранија е изградена во втората половина на 19 век. Припаѓала на неколку гранки од семејството Филевци, закупци на езерскиот риболов во турско време. Подоцна сопствениците се иселиле од Охрид, а останат е само споменот на старата жена Уранија, последен жител на домот, по која куќата го добила името.


фото Емилио
Ohridnews