Улиците се чистат од снег. Жителите од повисоките населби со најмногу проблеми

Како што информираат од ова јавно претпријатие, веќе е завршено чистењето на сите улици во градот, а тоа во континуитет се врши и во околината на градот, како и во охридските села.

До 7 часот утрината посипени се 10 кубици ризла и сол по коловозите од прва, втора, трета и четврта категорија. До пладне ќе се посипат уште 10 кубици ризла и сол. Освен од тротоарите и коловозите, екипите на Комуналец го чистат снегот и од дрвјата, за да не дојде до оштетување и кршење на гранки.

Активностите ќе продолжат зависно од интензитетот на врнежите од снег во текот на денот.

Најмногу проблеми вообичаено има во ридските предели, во Варош и во населбата кај бараките. Жителите од оваа населба реагираат дека секоја година при снег се соочуваат со исти проблеми, неисчистени учици, смрзнати тротоари. Тие апелираат до надлежните служби да си ја завршат својата работа,  за да не се случи да бидат блокирани поради снегот со денови. Тие посочуваат дека редовно ги плаќаат сите давачки кон јавните претпријатија од кои очекуваат поефикасно да делуваат во вакви ситуација.

Од регионалната Дирекција за управување со кризи информираат дека состојбата е стабилна во општина Охрид и во Струга каде се забележани поинтензивни врнежи од снег. 

Според информациите од Автомото сојузот на Македонија  сообраќајот на сите магистрални и регионални патни правци низ државата се одвива отежнато и во зимски услови поради врнежи од снег во поголемиот дел од државата.

На возачите им препорачуваме внимателно управување со возилата, прилагодување на брзината на движење и почитување на поставената сообраќајна сигнализација. Крајна внимателност и одржување на потребното растојание помеѓу возилата се препорачува низ клисурите и планинските превои каде е почеста појавата на поситни одрони и можна е појава на голомразица поради ниските температури. Интензитетот на сообраќајот на патните правци надвор од градските средини е умерен.