Владата со 4-тиот сет мерки делумно го спроведе ветувањето за смалување и воведување на линеарен данок на додадена вредност во угостителската индустрија и наместо угостителите од 1-ви Јануари 2021 година да бидат сите рамноправни и имаат една нова повластена даночна стапка на сите свои услуги во висина од 10% истата се применува и важи исклучиво за услуги на предавање на храна и на пијалаци за консумација на лице место и кетеринг услуги, со исклучок на алкохолни пијалаци, реагираше денеска Независната Угостителска Комора -НУК.

Со предизборните кампања на угостителите им беше ветено унифицирање на данокот на додадена вредност со една единствена даночна стапка од 10% ДДВ за сите ресторантски услуги. За жал Владата истата ја спроведе со парцијално решение на воведување на данок на додадена вредност во висина од 10% исклучиво за услуги на предавање на храна и на пијалаци за консумација на лице место и кетеринг услуги, со исклучок на алкохолни пијалаци. Со воведување на новата повластена стапка останаа во важност претходно важечките стапки во висина од 5% и 18% со што од 1ви Јануари во угостителската индустрија постојат 3 стапки на ДДВ и тоа 5%, 10% и 18% што на некој начин со почетокот на новата 2021 година создаде хаос во работењето. – велат од НУК.

Според НУК, воведувањето на новата даночна стапка во угостителството нема сите угостители рамноправно да ја почувствуваат. Рестораните, гостилниците, националните ресторани и сите оние кој работат со храна кои ќе имаат поголем бенефит од кафетериите, баровите, пивниците, ноќните клубови и дискотеките кои работат само со пијалоци. Краткорочни и брзи позитивни ефекти со воведувањето на новата стапка нема да има ниту пак битно влијание во работењето или брзото заздравување на угостителската индустрија од пандемијата Ковид-19. Долгорочно гледано бенефитите и покрај тоа што не е во целост применета новата стапка од 10% на сите угостителски услуги ќе има позитивен ефект во законското работење на угостителите, посочуваат од НУК.

Дополнителен проблем во моментов е што голем број на угостители нема да можат веднаш да го користат бенефитот од новата повластена даночна постапка затоа што со исклучок на Давид Компјутери кои на својата страна објави упатство како да се подесат фискалните принтери за користење на новата повластена ставка останатите продавачи и сервисери на фискални апарати сеуште немаат објавено соодветни упатства. За хаосот да биде поголем на сето ова создава и Правилникот направен од Министерството за финансии за начинот на воведување на новата стапка на ДДВ во висина од 10% кој е објавен во Службен весник бр. 315 еден ден пред почетокот на неговата примена на 30ти Декември 2020 година што остава многу кратот рок на прилагодување на ПОС системите кај угостителите и користење на новата повластена даночна стапка. – истакнуваат од НУК.

НУК предупредува дека со новата даночна стапка се појавува и понатаму проблемот и можноста за различно толкување и правото на користење на двете повластени стапки од 5% и 10% во еден ист објект кои се употребуваат за достава на храна со 5% ДДВ и предавање на храна и на пијалаци за консумација на лице место и кетеринг услуги со 10% ДДВ.

Поради пандемијата Ковид-19 голем број угостителските објекти воведоа во своето работење достава на храна. Угостителите кои покрај предавањето на храна на лице место и кетеринг услуги ќе сакаат да продолжат да работат со достава на храна и примена на повластената даночна стапка од 5% ќе треба да регистрираат посебни подружници во своите објекти со посебни фискални апарати преку кои ќе го остварат правото на користење на оваа повластена даночна стапка како би се избегнеле можноста за манипулација и повторна злоупотреба на правото на користење и толкување на даночната политика и од страна на угостителите и од страна на даночните инспектори. – велат од НУК.

Независната угостителска комора најави дека ќе се заложи во наредниот период што побрзо Владата да го доисполни своето изборно ветување за една даночна стапка за сите угостителски услуги односно да ја исправи грешката што ја направи со парцијалното воведување на новата повластена стапка од 10% за услуги на предавање на храна и на пијалаци за консумација на лице место и кетеринг услуги, со исклучок на алкохолни пијалаци.

Од друга страна, директорката на Управата за јавни приходи Сања Лукаревска, денеска на пресконфоренција, изјави дека заложбата на Владата е ставките за ресторанските услуги да бидат 10 проценти и тоа е влезено во законска рамка, а засега остануваат три ставки.

Во овој момент има три ставки, односно пет отсто за земање на нарачка, 10 отсто за јадење во ресторан и кетеринг и 18 отсто продажба на алкохолни пијалаци, коешто не може да биде во рамките на претходните две. Ова е еден вид на реализација на дел од програмата на Владата и во континуирана соработка со засегнатите страни, а имајќи предвид дека угостителите се на удар во оваа корона криза, во иднина ќе ги детектираме и останатите нивни потреби и проблеми, рече Лукаревска, одговарајќи на новинарско прашање дали Владата ќе го исполни предизборното ветување да има една даночна ставка за ресторанските услуги, оти вчера угостителите реагирале дека наместо една добиле три ставки.

Таа рече дека со претставниците на угостителите е во постојана комуникација и за ставките за ресторанските услуги разговарале на 31 декември и дека тие биле информирани за трите ставки.

OhridNews