Главниот инспектор на УЕФА, Герхард Капел,вчера ги предаде доказните материјали до Министерството за внатрешни работи на Македонија, врз основа на кои Победа е осудена од европската куќа на фудбалот на осум години, без право на настап во интернационалните натпреварувања.
Капел најави дека се води истрага за местење натпревари уште против Милано, Вардар и Работнички.
Претставникот на УЕФА наведе дека Милано се товари за „наместен меч во јули“. Во јули Милано играше два дуела со Славен Копривница во Европската лига, кога Кумановци дома загубија со 0-4, а таму со 2-8.
За Вардар, според Капел, има наоди „дека одел против спортските принципи пред две години“. Пред две години Вардар играше меѓународни средби со Анортозис во Купот на УЕФА кога два пати загуби со 0-1.
Кај Работнички под лупа се два меча, но Капел не прецизира кои и кога се играни. Пред две години босанските медиуми погодија дека „романтичарите“ ќе победат со 2-1 на гости во Мостар, во Купот на УЕФА, еден ден пред мечот.
извор “Дневник“
