Романскиот ракометен репрезентативец Маријан Козма е убиен, хрватскиот репрезентативен голман Иван Пешиќ остана без бубрег, а Србинот Жарко Шешум е полесно повреден, откако синоќа биле нападнати во ноќен клуб во Веспрем, западна Унгарија, соопшти унгарската полиција.
Полицијата соопшти дека непознати напаѓачи ги нападнале со ножеви ракометарите во клубот во Веспрем, додека овие го прославувале раѓањето на детето на еден од соиграчите.
26-годишниот Козма починал на патот кон болница. Тој бил прободен во срцето и брзо по доаѓањето во болницата е прогласена неговата смрт. Пешиќ бил прободен во грбот и морал да подлежи на операција во која му е изваден повредениот бубрег, додека Шешум за среќа се извлекол само со полесна фрактура и иако треба да се оперира, сепак е вон животна опасност.
Мотивите за нападот се уште се непознати и наскоро се очекуваат подетални информации за грозоморниот настан.
