Бројот на високостручни кадри кои се без работа, на охридското подрајче, од година во година се повеќе се зголемува. Според последните податоци, во Агенцијата за вработување во Охрид се регистрирани вкупно 982 невработени со високо образование и 351 невработен со виша школа. Според процентуалната застапеност по стручни звања, најмногу ги има од областа општествените науки.
Меѓу невработените охриѓани со факултетски дипломи, најбројни се менаџерите по туризам, од нив има дури 118 невработени. На вторто место се дипломците од областа на правните науки со вкупно 89 невработени, од кои 15 се од правосудна насока. Трети по бројноста се дипломираните економисти, со вкупна бројка од 60 невработени. Судбината да чекаат вработување преку охридскиот центар за вработување, ја делат и 26 лекари, 29 стоматолози и 26 учители. Исто така голема е бројката и кај менаџерите за осигурување, кои во евиденцијата се застапени со бројка од 51 невработен.
– Во целокупната евиденција на невработени, најпроменлива е состојбата кај оние со високо образование, но за жал во нагорна линија. Последниве неколку години има се повеќе невработени со завршен факултет. – велат од Центарот за вработување Охрид. Тие објаснуваат дека засега најголема среќа во наоѓањето на работа имаат информатичарите и професорите по странски јазици.
