Туристичкиот сектор по денешното одложување на собраниската седница на неодредено време и повторното одложување на усвојување на петтиот пакет мерки за помош на фирмите, реагира на односот на народните пратеници, кои, како што се наведува во реакцијата, не покажуваат никаква солидарност со стопанството. За туристичките работници изјавата на пратеникот Скендер Реџепи, дека граѓаните ќе можат уште некој месец да издржат без пари, бидејќи поважен е законот за државјанства, е непримерна.
Додека нас ни пристигнуваат опомени од УЈП за нереализирана плата за месец февруари и не знаеме што да правиме, бидејќи пари нема, сметаме дека овие денешни случувања се крајно загрижувачки и испраќаат негативна порака до нас како сектор и општо како граѓани на оваа земја, и ни даваат до знаење дека сме оставени на милост и немилост без никаква солидарност и разбирање за сериозноста на кризата со која се соочуваме, велат од туризам. Бидејќи пратениците очигледно не знаат како е да се живее и преживува во оваа ситуација, ги повикуваме да повелат во било која отворена туристичка агенција во земјава и да видат какво е секојдневието и како се живее без плата и работа. – стои во реакцијата.
Туристичките работници апелираат до пратениците да престанат со негативни пораки и конечно да ги усвојат мерките за помош кои, како што се наведува во соопштението, доцнат веќе цел месец.
Во спротивно сите декларации за плата ќе бидат доставени во Собранието, заедно со ваучерите за туризам, бидејќи нашите агенции нема повеќе да постојат. – истакнаа од туристичките агенции, кои се меѓу најпогодените од ковид кризата.
OhridNews
