Туристичката понуда на Македонија, најатрактивните локалитети во земјава и локалните туристички продукти се презентираат на Меѓународната туристичка берза што до 6 март се одржува во Берлин, Германија.
На големиот саем за патувања, иновации, знаење и инспирација за поместување на туристичките граници, ќе се претстават 190 земји и региони со 5.600 излагачи, сите со свои атрактивни и иновативни туристички продукти.
Презентацијата на можностите, кои ги нуди Македонија за светските патувачи, во Берлин се одржува во соработка на Агенцијата за промоција и поддршка на туризмот со рекорден број коегзибитори, тур-оператори и хотелиери, меѓу нив и од Охрид.
Од Агенцијата посочуваат дека германскиот туристички пазар станува приоритетен, поткрепено со фактот дека туристите од Германија се во првите пет по престој во земјава, со остварени 38 илјади туристички посети и 75 илјади ноќевања и реализиран 8-процентен раст забележан минатата година.
OhridNews
