Центарот за управување со кризи со соопштение реагира на изјавата на градоначалникот на општина Охрид, Александар Петрески, кој на вчерашната прес-конференција во Пештани, го обвини директорот на ЦУК, Панде Лазаревски дека наместо да биде во кризните подрачја, отпатувал во Париз. Во соопштението се наведува дека Лазаревски во Париз учествува на работен состанок на Европскиот форум за намалување на ризици од катастрофи и го афирмира македонскиот модел на Националната платформа.„Во изминатите недели, додека состојбата на теренот налагаше активно ангажирање на сите институции и ресурси за справување со непогодите, директорот Лазаревски ги откажа сите службени посети и се посвети на секојдневно ангажирање во Координативното тело и посета на погодените подрачја.
За разлика од градоначалникот Петрески, кој во најкритичниот период во охридскиот регион и со незавршени обврски замина на австралискиот континент со се уште неразсјаснета агенда, директорот Лазаревски беше присутен и во Охрид и во Струга, и во Дебар и во Пласница. Во меѓувреме, Центарот за управување со кризи секојдневно учествува на состаноците на Координативното тело за справување со елементарни непогоди и секојдневно е на теренот заедно со другите надлежни служби, за разлика од тимот предводен од градоначалникот Петрески.
Наместо изнесување инсинуации и квалификации во јавноста, г-дин Петрески пред своите граѓани треба да даде одговор на прашањето : колку општина Охрид ги има спроведено обврските кои произлегуваат од Законот за локална самоуправа, Законот за управување со кризи и Законот за заштита и спасување, во деловите кои се однесуваат на задачите и обврските на општинските власти при заштитата од природни непогоди“- се наведува во соопштението.
OhridNews
