Лидерот на СДСМ, Бранко Црвенковски, на протестниот митинг „Ние сме за победничка Македонија“ пред Владата, рече дека со протестот го означува почетокот на битката за предвремени парламентарни избори после ноември.
„Без разлика на исходот од Самитот на НАТО, без разлика дали преговорите со Грција ќе завршат успешно или не, нашата цел е во ноември Собранието да се распушти и да излеземе пред граѓаните“ , рече лидерот на најголемата опозициска партија, Бранко Црвенковски.
Црвенковски рече дека тој и неговата партија знаат дека изборите пред ноември би биле погубни за иднината на земјата и дека такви избори не бараат и на такви нема да учествуваат.
Црвенковски ја осуди Грција дека ги злоупотребува своите права како членка на НАТО и ЕУ и како што рече, таа спроведува неправедна, недемократска и неевропска политика кон Македонија.
На митингот на СДСМ се обратија и Ѓорѓи Оровчанец, како претставник на опозицискиот фронт, архитектот Мирослав Грчев, Жарко Трајаноски од граѓанската иницијатива „Граѓани за европска Македонија“, Ивица Младенов претседател на „Хоризонт“, Дејан Гацев поранешен потпарол на ФЗОМ и претставници на млекарите и стечајците.
Извор: Makfaks
