Три години Ohridnews

Првиот локален електронски весник во Македонија, нашиот и вашиот „ Ohridnews“, денеска го прославува третиот роденден. За овие три години дружење што се зад нас весникот има објавено речиси 18 илјади информации што го привлекле вниманието на четири милиони читатели. Секојдневно Ohridnews  е интересен за над 25 илјади интернет-корисници, има речиси 9000 IP адреси и над стотина он-лајн читатели во секое време, а информациите што го прават нашиот портал најчитан во регионот не ретко ги користат локалните, но и националните медиуми и агенции.

Силната доверба што ни ја укажувате, Вие почитувани читатели, само не обврзува да продолжиме да се подобруваме и да ги поправиме грешките, за кои веруваме дека имате разбирање оти се составен дел од работата. Подготвуваме и повеќе новини, за кои цениме дека ќе ги оправдаат вашите очекувања.

Изминатите три години трпеливо го градевме нашиот медиум, да биде респектиран од сите, но особено од пребирливата охридска публика. Но, не застануваме тука. Наредниот период нашите активности ќе ги насочиме кон негова надградба, за преку навремено, точно и објективно презентирани информации да го задржиме вашето внимание, но и да се обидеме преку заеднички ангажман да го подобриме живеењето во нашиот град во сите аспекти. Токму за таа цел, Ohridnews преку почитување на професионалните новинарски начела и натаму напорно ќе работи и во иднина за да ја оправда вашата доверба и да го задржи интересот на читателите, за кои впрочем и постои.