Како што не информира првиот човек на фестивалот, Зоран Велјаноски- Летра, за третото издание на фестивалот планирани се десет долгометражни и 5 краткометражни филмови кои ќе бидат во конкуренција. Дневно ќе се прикажуваат по два филма, а проекциите ќе започнуваат од 18 и 20.30 часот. До сега, селектирани се 4 филма: “ Многу сум среќен што мајка ми е жива” на Клод и Натан Милер, “ Треф дама” на Жером Бонел, “ Црна овца” на Паскал Елбе и “ Слобода” на Тони Гатлиф.
И годинава, на фестивалот ќе гостуваат познати француски имиња од светот на филмот и музиката. Потврдено е присуството на француската пеачка Лио, продуцентот Франсоа Лепети, ( продуцент на филмот Тројца мажи и бебе), како и режисерите Натан Милер и Клод Бонел.
“ Сигурни сме дека и годинава салата во Центарот за култура ќе биде полна при секоја проекција, како што беше случај и изминатите две години” , вели директорот на фестивалот Зоран Велјаноски- Летра. “ Очигледно е дека охридската публика е желна за добар филм, а тоа го докажаа полните сали, од што и ние самите сме пријатно изненадени”. Минатата година, проекциите ги проследиле околу 8. 000 љубители на филмот.
Летра потенцира дека Фестивалот на француски филм е вистинска можност за бројни средби и потенцијални соработки помеѓу македонските и француските продуценти. “ Фестивалот носи плодови за Охрид, но и за Македонија” , потенцира Летра. “ Плодови за културата, филмската индустрија и се надевам дека за четири до пет години ќе се снимаат филмови во Охрид, од македонска и француска продукција” .
Во тек се преговорите околу комплетирањето на жири комисијата, за која е сигурно дека ќе биде составена од звучни имиња од светот на филмот.
Свеченото затворање на фестивалот е предвидено да се одржи на 3 јули, во Антички театар, кога ќе му биде предадена Златната маска за животно дело на годинешниот добитник, чие име сеуште не се открива.
Ќе бидат доделени и златната маска за најдобар филм, режија, краткометражен филм, за најдобра машка и женска улога, како и за најдобро сценарио.
