Охрид заслужува да свети во полниот негов сјај. Охриѓани и туристите заслужуваат нови места за рекреација на современ и модерен начин. Уредувањето на зелените површини во корелација со подигнување на свеста за зачувување и одржување на јавните паркови и зеленила, резултираат со формирање на пријатни катчиња за одмор и релаксација на граѓаните и туристите од сите возрасни групи, истакна на денешната прес конференција кандидатот за градоначалник од ВМРО ДПМНЕ и коалицијата, д-р Митко Тилевски. Тилевски додаде дека со уредување на нови и одржувањето на постојните паркови ќе се придоне кон поубав и позелен лик на градот. При тоа го најави проектот за изградба на велосипедска патека Охрид – „Свети Стефан“.
– Проект кој ќе овозможи безбедно движење на велосипедистите на потегот од излезот од градот до туристичката населба „Свети Стефан“, подоцна со изработка на проект ќе се утврди можноста оваа патека во втора фаза да биде изградена до Пештани. Со оваа патека, охриѓани и гостите ќе имаат можност да го користат своето време активно, практикувајќи здрави навики за возење велосипед. Оваа мерка е во корелација со мерката за субвенционирање на купување на велоспидед, рече Тилевски.
Истакна дека ќе продолжи и партерното уредување, изградба на пешачки и велосипедски патеки.
– Предвидуваме изградба на патека од Пристаниште до Канео и Лабино, која ќе претставува ново обележје на Охрид и нова можност за рекреација. Тоа повлекува и реконструкција на бедемските ѕидови над плажа Лабино, завршување на бедемските ѕидови и патека од источната страна на Тврдината и изградба на пешачка патека околу целиот комплекс. Стар град – Реконструкција и изградба на потпорни ѕидови и улици, Стар град – пешачка патека од Саат кула до ОУ „Свети Климент Охридски“, изградба на Центар за спортови на вода, изградба на авантуристички (адреналински) паркови. Со овој проект на посебно избрани локации ќе се изградат повеќе авантуристички (адреналински) паркови кои по примерот на развиените туристички дестинации во светот предвидува поставување опрема и реквизити за забава на посетителите од сите категории и тоа амбиентално вметнати во самата локација и природа без да се нарушува автентичниот изглед, рече Тилевски.
Тилевски најави и изградба на вежбалиште за голф. Како што појасни, ќе служи за учење и усовршување на голф-техниките како неопходен чекор за совладување на основните правила и техники на голфот, како и место за рекреација на голем број граѓани и туристи. Локацијата ќе биде партерно уредено место и на неа ќе бидат поставени позиции и реквизити за учење и усовршување на голфот. Теренот ќе има свое кафуле и снек-бар како и продавница за голф-реквизити.
OhridNews
