Додека возрасните не ги повлечат вистинските потези, струшките средношколци од двете најголеми етнички заедници во Струга кои учат во средните училишта „Нико Нестор“ и „Ибрахим Темо“ остануваат поделени. Албанците во училишните клупи, а Македонците надвор од нив.

Вчера беше спречен протест на албанските ученици. Од општината велат дека средношколците сакале да го искажат својот револт низ градските улици поради мешањето на политиката во училиштата и поради веќе искажаната толеранција кон учениците Македонци.


Се’ се гледа ама никој да види

Од друга страна, дел од струшките средношколци Македонци вчера заминаа во Скопје каде што одржаа прес-конференција во елитниот хотел „Холидеј Ин“.Тие го повторија ставот за воведување еднојазични смени и рекоа дека не се санкционираат предизвикувачите на инцидентите во двете средни училишта кои делат еден двор. Кажаа дека зад нив стојат некои од невладините организации, но не и политички партии, но објаснија и дека во Скопје дошле на сопствен трошок.

Во струшката чаршија вчера беше мирно, но ретко кој сакаше да ја коментира чувствителната ситуацијата пред медиумите. Оние што го направија тоа, велат дека има соживот. Нивото на соживот го потврди и градоначалникот Рамиз Мерко, но и претставници од други институции.

Но, ако соживотот е навистина на  високо ниво, тогаш излезот лежи во едно прашање:зошто инцидентите се случуваат само во училиштата,а  не и на други места каде што се собираат и среќаваат средношколците од двете етнички заедници.

Ohridnews