Тендерот за изградба на улицата „Железничка“ пропадна, откако компанија која учествувала на него го обжалила истиот до Врховниот суд. „Поради тоа не можат да отпочнат градежните работи за реконструкција на „Железничка“ за што беа обезбедени средства од буџетот на државата“, изјави денеска во Охрид, министерот за финансии, Трајко Славески. Тој посочи дека поради обжалување на тендерските постапки не можат да се реализираат голем број проекти. Славески објасни дека за улицата „Железничка“ ќе биде објавен нов тендер, по што ќе се пристапи кон реконструкција на овој мошне значаен транзитен пат, кој веќе неколку години стои раскопан.
Запрашан зошто општината Охрид сеуште не преминала во втората фаза од децентрализацијата, министерот Славески истакна дека причина за тоа се наследените долгови на градот.
„Општина Охрид за жал има наследен долг кој што не и овозможуваше премин во втората фаза од децентрализацијата“ рече Славески. Тој појасни дека за евентуално преминување на општината Охрид во втората фаза од децентрализацијата потребно е да се изјасни посебната комисија во која учествуваат претствници на ЗЕЛС и Министерството за финансии.
Г.М.
