Фантастично за малку не успеавте да се вклучите во наградниот квиз! Овој автоматизиран одговор најчесто ќе го добиете од операторот на еден од актуелните интерактивни квизови што се емитуваат на комерцијалните национални телевизии. Ценатата на повикот е четириесетина денари, но никаде не ги пишува правилата на игра, а нормално тоа не го соопштува ниту заводливата водителка која во текот на емисијата не престанува да ги убедува гледачите да се јават и да заработат, како што вели, големи пари.
Темата не е нова, но е актуелна. Телевизиите користат недоречености во законот и организираат вакви квизови од кои само тие заработуваат големи пари, се разбира на сметка на гледачите кои без да ги знаат или чујат правилата на игра наседнуваат на примамливите суми кои како награда и „лесна заработувачка“ им ги нудат најчесто шарманти девојки.
Надлежните регулаторни органи официјално никогаш не го соопштиле својот став во врска со интерактивните телевизиски квизови, ниту соопштиле дека се преземени конкретни мерки за заштита на гледачите од евентуална измама, а молчат и здруженијата за заштита на потрошувачите. На граѓаните им преостанува да одолеат на “прималливата“ понуда, или да го променат каналот, на љубопитните пак не им бега висока телефонска сметка, се разбира доколку не ја освојат понудената парична награда која е нешто поголема од просечната македонска плата.
