Британскиот весник „Тајмс“ информира дека украинскиот претседател Володимир Зеленски преживеал најмалку три обиди за атентат во последните денови, пренесува МИА. „Тајмс“ неодамна објави дека платеници од т.н Вагнер група и чеченски специјални сили биле испратени да го елиминираат Зеленски.
Весникот пишува дека на Украина за плановите за атентат и дојавиле некои членови на руската Федерална служба за безбедност, кои се против војната, и оти припадниците на Вагнер групата претрпеле загуби во нивните обиди да го убијат Зеленски.
Неверојатно е колку е добро информиран тимот што го чува Зеленски, изјавил извор за Тајмс, додавајќи дека еден обид за атентат се случил во саботата и цитира изјава на Украина дека чеченските атентатори биле елиминирани во предградие на Киев.
Британски „Тајмс“ претходно објави дека рускиот претседател Владимир Путин испраќа група од околу 400 платеници од т.н. Група Вагнер да го убијат украинскиот претседател Володимир Зеленски.
Групата Вагнер е приватна милиција која, според „Тајмс“, добила наредба од Владимир Путин да го убие Зеленски и 23 други украински владини функционери, што би ѝ олеснило на Москва да ја преземе контролата врз Украина.
Станува збор за група високо обучени платеници контролирани од Евгениј Пригожин, близок соработник на рускиот претседател кој често се нарекува „готвачот на Путин“. Тие наводно пристигнале пред пет недели и им биле понудени огромни суми пари за атентат на Зеленски.
OhridNews
