Од СВР Охрид велат дека главна причина за големииот број сообраќајни несреќи ова лето е недисциплината на возачите. „Констатирано е дека прекршоци во сообраќајот прават сите учесници, од пешаците до возачите“, вели портпаролот на СВР Охрид, Стефан Димоски. Пешаците ги преминуваат улиците на необележани места, а возачите пак зборуваат на мобилен додека возат, не ја почитуваат хоризонталната и вертикалната сигнализација и возат побрзо од пропишаната брзина, додава Димоски. Тој информира дека полицијата постојано врши контроли и дека против сите прекрштели на сообраќајните прописи се поднесуваат соодветни пријави
Стефан Димоски – СВР Охрид
Покрај ниското ниво на сообраќајна култура, една од причините за сообраќајните несреќи е и патната инфраструктура која не е проектирана да прими триесет и повеќе илјади возила на туристи, како што тоа беше случај изминатиот викенд. Ќе треба секако да се размислува за подобрување на сообраќајната инфраструктура вели портпаролот на СВР Охрид, Стефан Димоски.
И додека полицијата укажува на сообраќајната недисциплина, граѓаните кои живеат на булеварот „Туристичка“ секојдневно се жртви на дивеењето на несовесни моторџии. Тие се жалат дека навечер булеварот е претворен во тркачка патека по која беснеат моторцикли. Тие стравуваат за својата безбедност поради што бараат од полицијата да преземе соодветни мерки против несовесните возачи.
