Светската пијанистичка елита дел од јубилејното Охридско лето

-Посебно ми е драго што овие големи пијанисти, по долгите преговори, се согласија да ни подарат по еден свој рецитал. И покрај тоа што се едни од најбараните инструменталисти во светот, издвоија време да се навратат на Охрид и Св. Софија. Длабоко верувам дека овие миленици на светската публика, се и миленици на македонската, затоа што со своите инзвонредни настапи на фестивалот оставија длабока трага во неговата историја, потенцира музичкиот селектор на фестивалот, Гордана Јосифоска- Неделкоска.

Петер Лаул, Николај Лугански и Денис Мацуев настапија за прв пат на оваа манифестација како многу млади, а Рамзи Јаса македонската публика имала можност неколку пати да го слуша низ неколкуте децении од постоењето на Охридско лето.

                                                                _{Петер Лаул}

Петер Лаул е роден во Санкт Петерсбург во музичко семејство. Добитник е на неколку меѓународни награди, а исто така и на почесен медал „За достигнувања во уметноста“ , доделен од Министерството за култура на Руската федерација. Тој настапувал како солист со Филхармонијата на Санкт Петерсбург, Оркестарот на Марински тетарот, Симфонискиот оркестар на Москва и соработувал со диригенти како Максим Шостакович, Валериј Гергиев, Жан-Клод Касадесус итн. 

                                                                 

Миленикот на македонската публика, Николај Лугански, учел на Московскиот конзерваториум, а настапувал со сите позначајни оркестри во светот и диригенти како: Кристоф Ешенбах, Владимир Федосејев, Валериј Гергиев, Михаил Плетњов.

_{Рамзи Јаса}

Рамзи Јаса е најдобриот египетски пијанист. Учел на конзерваториумот во Каиро како и на Московскиот конзерваториум. Забележителни се неговите настапи во: салата на Берлинската филхармонија, Кенеди центарот во Вашингтон, Барбикан центарот, Ројал Алберт Хол во Лондон и настапите со Зубин Мехта, Јехуди Мењухин и Владимир Ашкенази. 

_{Денис Мацуев}

Кариерата на Денис Мацуев завзема огромни размери по неговата победа на меѓународниот натпревар „Чајковски“ во Москва. Мацуев настапува во сите најзначајни концертни сали во светот и со легендарни диригенти како Клаудио Абадо, Лорин Мазел, Евгени Светланов и Владимир Спиваков.