Празникот на пролетта 22 март, младите го празнуваат како свој ден, ден на младоста, љубовта и убавината. Истиот ден Светата Православна црква го празнува споменот на 40 војници од Севастија кои маченички загинале за Христовата вера.
Житието сведочи дека во 320 година 40 војници од еден полк во Севастија ја одбиле наредбата да се поклонат пред римските идоли и да им принесат жртви. Поради тоа биле повикани кај градоначалникот, биле убедувани да се откажат од Христијанството, а кога тоа го одбиле биле затворени мачени и изведени пред суд. Биле осудени да стојат цела ноќ во вода што смрзува, времето било студено, а 40-те војници стоеле во студена вода во близина на бања со топла вода и им било кажано ако некој се откаже од Христос ќе може да оди во бањата со топла вода каде го чека гозба со вкусни јадења. Но, момчињата храбро ги издржувале мачењата цела ноќ молејќи му се на Исус.
Ноќта сите стражари заспале само еден останал буден. Во еден момент тој над главите на војниците забележал светли венци и бидејќи бил христијанин, веднаш влегол во водата молејќи го Бога и нему да му даде таков венец. Утрото измрзнатите војници ги натовариле на кола и ги одвеле надвор од градот каде ги запалиле.
За празникот Младенци поврзани се повеќе обичаи. Кузман Шапкарев сведочи дека спроти празникот се собирале 40 полжави, потоа правеле 40 сарми со ориз и расол, а на ручекот пиеле по 40 чаши вино во спомен на 40-те маченици.
Јасминка Т. Момироска
