Поранешната сопственичка на тепих, кој во 2010 година на аукција во Лондон бил продаден за неверојатни 7,2 милиони евра, сега бара оштета бидејќи таа претходно го продала за само 20 илјади евра. Тепихот со години лежел во наследство на некогашната сопственичка пред таа да одлучи да го понуди на аукциската куќа во градот Аугсбург, Германија. Тепихот првобитно бил проценет на 900, но бил продаден за 20 илјади евра. Само неколку месеци подоцна, истиот персиски тепих бил продаден за 7,2 милиони евра и така станал најскапиот тепих на светот.
Сега поранешната сопственичка ја тужи аукциската куќа од Аугсбург поради погрешна процена и бара оштета од 350 илјади евра, колку што бил проценет тепихот пред самата аукција во лондонскиот „Кристи“. Спорниот тепих со големина 3,38 со 1,53 метри датира од 17 век, а негова сопственичка била француската грофица Де Бег, која поседувала голема збирка дела од иранската уметност.
