Странците го спасуваат ние го уништуваме културното наследство

За еден месец само во струшко се украдени четириесетина икони, меѓу кои и вредни дела на Дичо Зограф. Крадците со себе однесоа и други вредни артефакти и незначителна сума пари. Последниот случај беше регистриран викендов во Вевчани. Од црквата Св. Никола, сред село, непознати сторители однеле четири икони.

И додека арамии ги пустошат македонските цркви пред очите на надлежните, странските донатори несебично се обидуваат да ни помогнат да го зачуваме културното наследство. Управата за заштита на културното наследство доби грант од САД во вредност од 650.000 долари за заштита на фрескоживописот во црквата Св. Богородица  Перивлепта. На спасување на оштетениот фрескоживопис ќе работи американски тим, а проектот според најавите ќе започне догодина.

Фрескоживописот во црквата Св. Богородица Перивлепта се смета за еден од најзначајните од византискиот период, но поради влага направени се големи оштетувања на северниот ѕид и доколку брзо не се интервенира , стручната јавност стравува дека постои опасност дел од фреските засекогаш да бидат изгубени.