Спротивно на сите законски одредби од Законот за туристичка дејност се повеќе странски во улога на локални туристички водичи објаснуваат за охридската култура, историја и традиција на начин на кој што нив им одговара.
На наше барање, на наши молби, инспекциските служби излегуваат на терен, но конкретно во летните месеци, пазарната инспекција и инспекторатот при општина Охрид, не можат да излезат на крај со сите предизвици со кои се соочуваат, па често пати несанкционирано поминуваат странските водичи. – вели Климент Наумов од здружението на туристички водичи „Кеј“.
Дополнително законодавецот нема предвидено соодветни казни за санкционирање, од каде се појавува потребата да се етаблира еден нов орган така наречена комунална полиција која би се занимавала со овие проблеми.
Во неколку наврати самоиницијативно како здружение сме се организирале да им укажеме на нашите колеги од странство дека прават големи престапи при тоа барајќи ги службите од инспекторатите. Но, додека не биде некој казнат или бидат изведени на суд да бидат осудени по брза постапка овој проблем нема да се регулира.- додава Наумов.
Инаку, во Охрид има околу 225 регистрирани туристички водичи според статистиката што се води на Факултетот за туризам, а во регистарот што го води општина Охрид евидентирани се 187 туристички водичисо соодветна лиценца. Нема нерегистрирани туристички водичи.
Н.С.Ј.
