Избраниците на Лазовски успеаја дефицитот од минус шест да го претворат во плус девет и како севкупни победници патуваат во Холандија во Ден Бош на двомеч со Ајфел Тауерс.
– Влеговме до мечот, резултатски неоптеретени и со желба да се прикажеме во добро светло. Не размилслувавме многу за резултатот кој ете во финишот не припадна нам – вели Марјан Лазовски.
Совкоски беше играчот кој блесна во последната четвртина реализирајќи три тројки.: – Водевме во текот на целиот натпревар, моите тројки во финишот беа плод на воиграни акции. Во Охрид промашивме неколку удари за три , додека во Лашко тоа ни појде од рака.
Алеш Пипан, словенечкиот селектор на клупата на Лашко го призна поразот.
– По првиот натпревар во Охрид ја предупредив екипата дека не е се готово. Во нападот игравме брзоплето, а лошо затворавме во одбраната. Не го заслуживме пласманот во второто коло.
Капитенот на Златорог Нејц Странд причината за поразот ја бара во непослушноста на екипата.
– Не ги послушавме инструкциите на тренерот, бевме многу нервозни и премногу солиравме. АМАК ги казни сите наши грешки.
Фото : Грегор Катич
