Стартот на кошаркарското Европско првенство (ЕП) во Полска (7-20 септември) е сé поблиску, а со тоа и историскиот дуел на македонската селекција против Грција,  на отворањето на континенталниот шампионат во Познањ.

Како што одминува времето, товарот сé повеќе надвиснува врз плеќите на избраниците на селекторот Јовица Арсиќ, кои во Полска ќе имаат исклучително тешка задача за истовремено водење спортска, но и на политичка војна, која самата ситуација им ја наметнува, и тоа без нивна желба.

Капитенот на жолто-црвената чета, Врбица Стефанов, има рецепт како да се издржи притисокот, кој од ден на ден е сé поголем, но и да се стигне до толку посакуваната победа.

– На натпреварот со Грција треба да гледаме како на уште еден обичен меч и ништо повеќе од тоа. На средбата со јужниот сосед мора да и пристапиме со ладни глави, сконцентрирани само на спортскиот дел од натпреварот. Ние сме спортисти и не гледам причина зошто политиката би се пренела на терен, иако сум свесен дека ќе биде тешко да се одделат двете работи – ни изјави Стефанов.

Популарниот Врба во два наврати настапуваше во првенството на соседна Грција, каде што, како што вели самиот, немал никакви проблеми со фактот што е Македонец. Тој во почетокот од интернационалната кариера го носеше дресот на солунски АЕК за пред две години извесен период да мине во Атина настапувајќи за екипата на Олимпијакос.

– Доста добро се познавам со поголем дел од грчките репрезентативци, а со дел од нив и имам настапувано и заедно. Сигурен сум дека на паркетот нема да има никаков проблем, со оглед на тоа што и ние и тие сме професионалци што живеат од кошарката. Очекувам исклучително интересен натпревар. Шансите за победа ги гледам во нашиот колектив и во нашата смирена игра. Доколку во мечот со Грција би влегле со голем набој и преголема возбуда, сигурен сум дека нема да поминеме добро – дополнува капитенот Стефанов.

Македонските кошаркарски репрезентативци во скопската сала „Борис Трајковски“ ќе работат до следниот четврток. Потоа следува патување во германскиот град Бамберг и учество на „Президент купот“ (21-23 август), каде што наш прв противник ќе биде домаќинот Германија. Втората двојка ја сочинуваат Хрватска и Полска.

М.П.