-Не смееме да дозволиме и покрај сите проблеми кои ги имаме и околу името и околу позиционирањето на државата работниците да станат колатерална штета од социјален и политички аспект.- рече Живко Митрески, в.д. лидер на ССМ.
Живко Митрески
Мерки за надминување на кризата најавуваат и работодавачите. Тие предупредуваат дека слабата економија не може повеќе да ја финансира гломазната администрација. Организацијата на работодавачи очекува Владата да покаже одговорност и да ги прифати предлозите за надминување на последиците од економската криза, што според работодавачите, допрва уште посилно ќе се чувствуваат.
Марк Левин-директор на Меѓународната организација на труд за ЈИЕ, смета дека Македонија го подобрува социјалниот дијалог, но изрази загриженост за високата стапка на невработеност во земјата, која како што истакна е највисока во Европа. „Социјалните партнери треба да работат на подобрување на состојбата“, додаде Левин.
Според министерот за труд и социјални работи, Џељаљ Бајрами, податоците на Државниот завод за статистика не ја отсликуваат реалната состојба со невработеноста, затоа што голем број од евидентираните невработени “работат“ во таканаречената сива економија.
-Сивата економија е проблем со кој мора да се соочиме сериозно затоа што и покрај високите казни и измени во законот, инспекторите за труд при контролите секојдневно откриваат непријавени работници.-подвлече Бајрами. Тој истакна дека за овој проблем ќе се разговара со социјалните партнери во Економско-социјалниот совет и дека сериозно ќе бидат земени предвид предлог антикризните мерки на Синдикатот и Организацијата на работодавачите.
Министерството за труд и социјала во Охрид е домаќин на дводневната конференција за „Улогата на Економскско-социјалните совети во надминување на економската криза“, на која учествуваат претставници на влади, работодавачи и синдикати од единаесет земји од регионот.
